Paris St-Germain (PSG) chuan Barcelona midfielder thiam tak, kum 18 mi Dro Fernandez chu an lak luh fel thu an puang a. He transfer chungchangah hian Barcelona lam an lungawi lo hle a, an president Joan Laporta chuan thil thleng hi ‘unpleasant situation’ (thil duhawm lo tak) a nih thu a sawi chhuak hial a ni.
Spain media-te tarlan danin, PSG hian Fernandez-a man atan hian euro maktaduai 8.2 (£7.1m vel) an sem a. Hei hi a release clause maktaduai 6 aiin a tam zawk a, club hnih inlaichinna a chhiat loh nan PSG hian sum hi an vawm tam deuh nia sawi a ni. Fernandez hian kum 2030 thleng cham turin PSG hi a zawm a ni.
Joan Laporta chuan Catalunya Radio hrilhin, Fernandez-a chhuah dan chu a beisei loh hle tih a sawi. ‘Thil thleng hi a lawmawm lo hle a, kan beisei loh tak a ni. Kum 18 a tlin huna kan kalpui dan tur chungchangah thuthlukna kan lo siam fel tawh a, mahse a aiawh (representative) hian kan thil lo sawifel tawh kha a kalpui theih loh thu min hrilh thut a ni,’ tiin a sawi.
Barcelona coach Hansi Flick pawhin thla hmasa khan Fernandez-a chungchang hi a lo sawi tawh a. Tleirawl te hian club hi ‘an nuna’ an hman tur a nih thu leh, France lama a chhuak a nih chuan thil sual a tih a rin thu a lo sawi tawh a ni. Dro Fernandez hi La Masia academy atanga chhuak a ni a, Barcelona senior team-ah vawi 5 a inlan hman a, Champions League-ah pawh Olympiacos lakah a inlan a ni.
Fernandez chuan PSG a zawm thei chu a chhuang hle tih a sawi a. PSG hi naupang a nih atanga a lo tan thin leh, player ropui tam takte lo khelhna thin a nih avangin a hlim hle tih a sawi. Instagram lamah pawh Barcelona a chhuahsan chu a nuna thutlukna harsa berte zinga pakhat a nih thu a ziak lang a ni.