England international khel thiam Raheem Sterling chuan Chelsea football club nena inremna siamin, a contract neih lai chu a hun hmaa tihtawp a ni ta tih hriat a ni. Kum 31-a upa Sterling hian Chelsea-ah hian thla 18 dang contract a la nei a, kar khat hlawh pawh £325,000 zet a ni. Tunah erawh club nen zalenna nei tura inremna an siam hnuah, thla thum leh a chanve zet a awmna Stamford Bridge chu a chhuahsan ta a ni.
Sterling hian kum 2022 khan Manchester City atangin £47.5m zetin Chelsea hi a zawm a ni. Chelsea chuan thuchhuah siamin, ‘Raheem-a’n Chelsea tana a thawhhlawm zawng zawngah khan kan lawm a, a hmalam hunah duhsakna kan hlan e,’ tiin an thlah a ni. Sterling hian vawi 81 a inlan hman a, goal 19 a thun hman bawk a, mahse a zawm hlima beisei a phak loh avangin sawisel a hlawh hle a ni.
England tana vawi 82 zet khel tawh winger hian May 2024 hnuah Chelsea tan competitive match a khel leh tawh miah lo a ni. Manager thar Enzo Maresca-a’n a plan-ah a tel lo tih a hrilh hnuah, Sterling hi club thar zawng tura tih a ni a. Nipui transfer-ah khan a chhuak ta lo a, chumi hnuah club-ah pawh ‘bomb squad’ tia sawi, squad pangngai atanga hranpaa training nei zingah Cobham base-ah hun a lo hman phah tawh a ni.
Juventus leh Bayer Leverkusen te pawhin lakluh an lo tum tawh a, Fulham pawh khan a zawm teuh viau a ni. Liverpool-a professional debut nei tawh Sterling hian a career chhungin trophy 13 zet a chawi tawh a, tunah hian London khawpuia awm zui a la duh viau rualin, khawiah pawh khelh erawh a inhuam thu leh, ram chhung emaw ram pawna khelh pawh a hreh loh thu hriat a ni.