Centers for Disease Control and Prevention (CDC)-a hriselna lam kaihhnawih database tam tak chu hriattirna leh hrilhfiahna awm miah lovin tih tawp a nih thu, ‘Annals of Internal Medicine’-a zirchianna thar tihchhuahah tarlan a ni. He zirchianna hi Boston University-a law expert Janet Freilich leh Vanderbilt University-a medical professor Jeremy Jacobs-te hovin neih a ni a, US hriselna lam dinhmun hriatna atana pawimawh em em data-te chu 2025 October thla atang khan update tawh lohva dah a nih thu an tarlang.
Zirchianna hmuh danin, thla tina update thin CDC database 82 zinga 38 (zaa 46 vel) chu hmuh theih lovin an lo tawp tawh a ni. A mak lehzual chu hetianga update tawh lohva dah zinga zaa 87 (database 33) zet hi hri danna (vaccination) lam kaihhnawih an ni hlauh mai a. Hri leng laka invenna pawimawh tak tak—flu, COVID-19, leh RSV hri danna lam data-te chu a tam ber an ni a, December thla thleng pawh khan database pakhat chauh lo chu update an la ni lo a ni.
He thil hian hriselna lama mithiamte zingah hlauhthawnna nasa tak a thlen a. Infectious Disease Society of America (IDSA) hotu leh National Institute of Allergy and Infectious Diseases director hlui Jeanne Marrazzo chuan he thil hi ‘thil pawi tak’ a nih thu a sawi. Marrazzo chuan administration thar hian hri danna an duh loh avangin mipui hriselna tana pawimawh data hi an hlamchhiah niin a sawi a, hei hian hri leng thar leh hri hlauhawm zual bikte laka invenna kawngah US chu dinhmun hlauhawmah a dah thei dawn a ni.
Health Secretary Robert F. Kennedy Jr. hi kum tam tak chhung hri danna (vaccine) lo dodal tawh thin tu a nih avangin, hetianga CDC data tih tawp a ni hi thil thleng palh anga ngai lo mi tam tak an awm a. Department of Health and Human Services (HHS) spokesperson Emily Hilliard erawh chuan heng thilte hi politics vanga tih a nih loh thu leh, ‘routine data quality’ vanga update hriat loh a nih thu a sawi thung. Mahse, mithiam tam tak chuan hriselna tana pawimawh data update loh hi hri leng laka America himna tichhe thei a ni tih an sawi uar hle a ni.