South Carolina state-a measles (vawkpuithu) hri leng chuan hma a sawn zel a, US-a state pakhata hri leng tam ber record a thiat tawh. He hri leng hi tun thla chhungin a darh nasa zual a, naupang eng emaw zat inkharkhip (quarantine) an ngaih phah hial a ni. He dinhmun hian United States-in measles hri a thianfai tawh tia a lo puan tawh chu dinhmun hlauhawmah a dah thei dawn a ni.
Tun thla ni 27 thlenga chhinchhiah danin, South Carolina-ah hian measles vei mi 789 an awm tawh a, nikum lama Texas state record mi 762 chu a khum tawh a ni. Kum 2000-a US-in measles a thianfai (eliminated) tih a puan hnuah hetiang record hi a la awm ngai lo. He hri darh chak dan en hian, kum 2026 hi US tan measles vei tam kum a nih hmel hle a, ram pumah hri vei mi 416 lai hmuh chhuah an ni tawh bawk.
South Carolina Public Health Department chuan sikul 23-ah measles a darh tawh tih an tarlang a. Hei vang hian naupang 557 chu inkharkhip tura tih an ni a, a darh loh nan hma lak mek a ni. Health department tarlan danin, hri vei zinga za zela 97 chu vaccine la lo emaw, la kim lo emaw an ni a. MMR vaccine hi vawi hnih lak chuan measles lakah za zela 97-in a veng thei a, hei hian vaccine lak pawimawhzia a tarlang chiang hle a ni.
Measles hi hri darh chak ber pawl a ni a, a hrik hi boruakah darkar hnih chhung a nung thei a ni. Vaccine la lo miin he hrik an kai a nih chuan, za zela 90-ah hian an damlo ngei ngei thin. Thuneitute chuan grocery store leh skating center ang chi hmun vantlang tlawh hlimte pawh fimkhur turin an chah a. Hri a len deuh bawk avangin leh hmun hrang hrangah a darh zel avangin, mipui te chu mahni hriselna vawng tha tura ngen an ni a, vaccine la lo te chu la thuai turin an chah bawk a ni.