South Korea President hlui Yoon Suk Yeol nupui, Kim Keon Hee chu Nilaini khan thamna a dawn avangin thla 20 chhung lung in tan turin hremna pek a ni. Seoul Central District Court chuan kum 52-a upa Kim-i hi thiam loh a chantir a, mahse stock price manipulation leh political broker laka thamna a lak nia puhna dangte erawh court hian a hlihsak thung. He thubuai hi ram hruaitu hlui leh an nupui/pasal-te pakhata hremna peksak ve ve an nih vawi khatna a ni a, South Korea tan chanchin thar pawimawh tak a ni.
Judge Woo In-sung chuan a thutlukna puan hian Kim hian a dinhmun sang tak chu mahni hlawkna atan a hmang sual hle tih a sawi a. Judge chuan, ‘Dinhmun sang apiangin mahni kan inven a ngai a, mahse he nu hian a hna leh a mawhphurhna te ngaihtuah loin mahni incheina leh nuamsa taka awm chauh a um a ni,’ tiin a sawi. Kim hi lung in tan tur bakah hian cheng vaibelchhia 12.85 (Mizo pawisaa chawhtlemin nuai 80 chuang) chawi tura tih a ni a, a diamond thi (necklace) lo dawn tawh pawh laksak turin thupek a chhuah bawk.
Special counsel team-te chhui danin, Kim hian kum 2022 khan Unification Church lakah cheng vbc 80 vel zet hu thilpek leh sum a lo dawng a ni. Heng thilpekte zingah hian Graff diamond necklace leh Chanel handbag hrang hrangte a tel a, business leh politics-a duhsakna a pek let theih nana pek a ni. Kim hian a hmain Chanel handbag-te chu a lo dawn ngei thu a pawm tawh a, mahse a hnuah a pek let leh vek thu leh engmah a hman loh thu a lo sawi tawh a ni.
Kim Keon Hee pasal, President hlui Yoon Suk Yeol pawh thuneihna hman sual leh dik lo taka martial law puan a tum avangin thla hmasa khan kum nga (5) chhung lung in tan turin hremna lo pek a ni tawh a. He thubuai kaihhnawihah hian Unification Church hruaitu Han Hak-ja pawh man a ni tawh bawk. Kim hian a hmaa thubuai a neih laite pawhin mipui hmaah ngaihdam a lo dil tawh a, mahse court chuan hremna hi pek a ngaiin a hmu a ni. Thiam loh a chantirna dangte hi court hian a la ngaihtuah chhunzawm zel dawn bawk a ni.