Prime Minister Sir Keir Starmer-a’n Chagos Islands, Mauritius hnena hlan a nih chungchangah United States sorkar nen inbiakna an la neih reng thu a sawi a. He thutlukna hi US President Donald Trump-a’n ‘thiltih âtthlak tak’ tia a sawisel hnuah, UK sorkar chuan thil awm dan hrilhfiah leh US thlawpna ngen tura hma an lak mek thu a tarlang a ni. Beijing lam pana a zin laiin Starmer hian reporters te hnenah he thil hi White House lam nen pawh kar hmasa tawp atang khan an sawidun tawh thu a sawi.
Kum kal taa inremna an siam dan chuan, UK hian Chagos Islands thuneihna hi Mauritius hnenah a hlan dawn a, mahse Diego Garcia-a sipai hmunpui (joint UK-US military base) erawh kum 99 chhung an hawh zui thung dawn a ni. Ministers te chuan he inremna hi Diego Garcia base ‘hmelma’ laka venhim nan a pawimawh hle tih an sawi a. Mahse, President Trump-a’n social media-ah he deal hi a duh loh thu a tarlan avangin, US thlawpna hi a reh mai ang em tih hlauhthawnna a awm tan a ni.
Conservative party lam erawh chuan he inremna hi ram himna atana hlauhawm thei niin an sawi a, Mauritius leh China inzawmna thuk tak avangin Diego Garcia base tan a pawi thei niin an ngai a ni. Tun hnaiah US Treasury Secretary Scott Bessent pawhin he inremna hi a sawisel a, UK sorkar chu US laka an ‘rinawm tawk lo’ (letting us down) ti hialin a puh bawk. Downing Street lam erawh chuan Trump-a hian Greenland chungchangah UK nena an inrem lohna avangin pressure pek nan a hmang mai a nih an rin thu an sawi thung.
Chagos Islands hi kum 1814 atang khan British thuneihna hnuaiah a awm tawh a, mahse kum 2021 khan United Nations court chuan UK hian thuneihna a nei lo tih a lo rel tawh a ni. He inremna hi thlenpui tur chuan kum 1966-a US leh UK inremna siam tawh pawh tihdanglam a ngai dawn a, hei hi Conservatives te chuan US tan he deal hi hnawl theihna hun remchang a nih an ring bawk. Inbiakna a la kal zel a, Parliament lama sawiho hun tur pawh sawn hlat a ni rih a ni.