UK Prime Minister Sir Keir Starmer chu China ram tlawh turin Beijing-ah a thleng thla ta a, hei hi kum riat hnua British Prime Minister-in China a tlawh lehna hmasa ber a ni. Ni thum chhung thang tur Starmer hian khawvel economy lian pahnihna nen hian sumdawnna leh hnam nunphung inlaichinna tihchak a tum hle a, mahse a zinna hian a ram chhungah sawiselna a tawk nasa hle thung.
Airport a thlen hian China sorkar hotuten lo lawmin pangpar an hlan a, Beijing-a Tiananmen Square-ah pawh British flag, Union Flag chu an thlawhtir bawk. Starmer chuan a hma lama ram pahnih inkar boruak lo nuam lo tawh thinte siamthat a pawimawh thu a sawi a, khawvel economy-a hnuhma lian tak nei China nena inbiakna neih reng chu UK tan hlawkna thlentu a nih a beisei thu a sawi a ni. He a zinnaah hian British business leader 60 zetin an zui a ni.
Mahse, he a zinna hi sawiselna a bang lo hle a, a bik takin Conservative hruaitu Kemi Badenoch chuan Starmer chu a ram himna aiin sumdawnna a ngaihpawimawh zawk avangin a sawisel nasa hle. Badenoch chuan British sorkarin London-a China embassy lian tak sak an phalsak pawh kha ‘spy hub’ a nih theih thu sawiin, Starmer-a chet dan chu ‘realism’ nei lo leh ram tana hlauhawm a nih thu a sawi a ni. Liberal Democrat hruaitu Daisy Cooper pawhin British citizen Jimmy Lai an la hren reng laia sorkarin sumdawnna a buaipui chu a dik loh thu a tarlang bawk.
China-in Xinjiang biala Uyghur Muslim-te chunga hleihlenna a lantir nia an puhna leh, Hong Kong-a democracy thlawptu Jimmy Lai an man chungchangte chu he inbiakna hian a tuam tel dawn em tih a la chiang lo. Starmer chuan US President Donald Trump nen pawh inlaichinna tha tak vawn a tum reng thu a sawi a, ram pahnih inkar boruak chu ‘strategic and consistent relationship’ a nih theih nan hma lak a tum tih a tarlang thung a ni. China nena inbiakna neih hi ‘lu phum tlat’ aiin a finthlak zawk thu a sawi bawk a ni.