UK politics-ah thawm a ring leh ta hle a, Conservative party hruaitu hlun leh Home Secretary lo ni tawh thin Suella Braverman chuan a party hlui chhuahsanin Reform UK a zawm ta. Braverman-i hi ni 11 kal ta chhung reuhva Tory MP sitting zinga Reform party zawmtu pathumna a ni a, hei hian Conservative party-ah buaina nasa tak a thlen dawn niin a lang.
Braverman-i hian party a thlak chhan sawiin, Conservative party chuan mipui duh dan leh ram tana tha tur an thlir tak tak tawh lo niin a tarlang a. Reform UK-ah chauh ram tana thahnemngaihna leh policy dik a hmuh thu a sawi bawk. Political analyst-te chuan Braverman-i hian Tory party-a ‘right-wing’ lam hruaitute leh mipuite a hip chhuak ve thei dawn niin an hmu a, hei hian Westminster-ah boruak thar a siam a ni.
Westminster lamah hian buaina dang pawh a la awm reng a, Prime Minister Keir Starmer pawhin Manchester mayor Andy Burnham-a’n Gorton leh Denton by-election-a chuh a tum a lo dan avangin sawiselna nasa tak a tawk bawk. Labour MP 50 vel zet chuan hemi chungchangah hian Starmer-a hnenah hian an lungawilohna lehkha an lo thehlut tawh a, hemi hian sorkar lai pawh a tibuai hle a ni.
Chanchin dangah, US-a Minneapolis-ah Border Patrol agent-te chuan Alex Pretti, kum 37-a upa chu Inrinni liam ta khan an kap hlum a. He thil thleng hi kar thum chhung chauha federal agent-te’n mi an kah hlum vawi hnihna a ni ta a, America khawpui hrang hrangah federal agent-te’n silaia mi an kap hlum fo mai hi mipuiin an sawisel nasa hle a ni.