Universal Pictures leh Illumination-te chuan hmanni lawk khan ‘Super Mario Galaxy Movie’ trailer thar an tichhuak a, he movie hian gaming leh animation ngaina tute a tibuai leh hle tawh a ni. He trailer-ah hian Mario fans ten an hmuh chak em em, dinosaur hring te reuh te leh hmeltha tak ‘Yoshi’ chu a rawn inlan ngei dawn tih nemngheh a ni a, hei hian kumin chhunga movie nghahhlaleh berte zinga pakhat a ni tih a tichiang hle.
Kum 2023-a chhuak ‘The Super Mario Bros. Movie’ hlawhtlinna hnuah, he sequel hian thawnthu thuk zawk leh hmuhnawm zawk a rawn chhawp chhuah a rinawm a. Movie hmasaa kan lo hmuh tawh Mario leh Luigi-te chu an rawn inlan leh dawn a, an ni hian Mushroom Kingdom leh Princess Peach te tanpuina nen khawvel danglam leh ropui tak an fang kual leh dawn a ni.
Voice cast lamah pawh a hlawhtling puitute an rawn inlan leh deuh vek dawn a. Chris Pratt chuan Mario aw a len leh dawn a, Charlie Day (Luigi), Anya Taylor-Joy (Princess Peach), leh Jack Black (Bowser) te pawh an awm leh vek a ni. Heng bakah hian hmel thar kan hmu dawn a, Brie Larson chu Princess Rosalina aw anga hman a ni dawn a, Benny Safdie pawhin Bowser Jr. aw a len bawk dawn a ni.
He trailer tharah hian Mario leh Luigi-te chu San Kingdom-a pipe pakhat chhia siam tura an kalnaah Yoshi nen hian an intawng ta a ni. Yoshi hi an team-ah a tel dawn nge ni a, eng ang role nge a neih dawn tih chu chiang taka sawi a la ni lo na a, trailer-a a inlan danah chuan pawimawh tak a ni dawn tih a hriat. Super Mario Galaxy Movie hi April ni 1, 2026 hian theatre-ah tlangzarh tura ruahman a ni.