Sweden sorkar chuan an rama gang (criminal networks) ho-in naupangte hmanraw atana an hman nasat zel dan chep nan, pawikhawihna thubuai vanga hrem theih kum (age of criminal responsibility) chu kum 15 atanga kum 13-ah tihhniam a tum thu a puang a. Justice Minister Gunnar Strommer chuan ram hi ‘emergency situation’-ah a ding a, gang-ho-in naupang an hman hi hmachhawn ran a ngai tawh a ni a ti.
He dan thar tur hi pass a nih chuan kumin nipui chhung hian hman tan tum a ni a. He hremna hi pawikhawihna lian tham, tualthahna, tualthah tumna, bomb tihpuah leh tharum hmanga hmeichhe pawngsual ang chite lakah chauh hman a ni ang. Ruahmanna hnu-ah hian kum tling lo, pawikhawihna lian tham laka inhnamhnawihte chu jail hial tantir theih an ni tawh dawn a ni.
Sweden sorkar hian kum 2022-a thuneihna an chan atang khan gang-ho leh misual pawl-ho beih hi an ngaihpawimawh ber pakhat a ni a. Swedish National Council for Crime Prevention tarlan danin, kum 10 kal ta chhung khan kum 15 hnuai lam pawikhawihna laka inhnamhnawih hi a let hnihin an pung a ni. Prime Minister Ulf Kristersson chuan, ‘Naupangte leh thil sual ti hriat lohte venhim nan sorkar chuan hma a la dawn a ni,’ tiin a sawi.
Mahse, he ruahmanna hi police, lung-in thuneitu leh dan hremi tam tak chuan an thlawp lo thung a. Police authority-te chuan he dan hian gang-ho chu naupang kum naupang zawk te hmanraw atana hmang turin a nawr zawk dawn a ni tiin an hlauhthawn thu an sawi. Swedish broadcaster SVT-in a tarlan danin, mi tam tak chuan naupang hrem aiin enkawlna kawng dika hruai an pawimawh zawk tih an la vawng nung tlat a ni.