Tun hma chuan syphilis natna hi kum 1495-a King Charles VIII-an Naples a beih laia a sipaite atanga darh tan nia hriat a ni thin a. He hun hi Europe rama venereal syphilis pandemic hmasa ber leh nasa ber anga ngaih a ni a, mi maktaduai 5 vel zet an thih phah nia sawi a ni. Mahse, thiamna thar hmanga zirchianna hian he hri hlauhawm tak hi kan ngaih aiin a lo upa daih tawh tih a tarlang ta a ni.
Anthropologist Elizabeth Nelson leh a thawpui mithiamte chuan Colombia-a thlan hlui (rock shelter) pakhat atangin kum 5,500 zet kal taa nung thin Treponema pallidum genome an hmu chhuak a. He hmuh chhuah thar hian syphilis, bejel, leh yaws ang chi natna thlentu ‘pathogen’-te hi kan lo rin aiin kum sang tam takin an lo upa tawh tih a hriattir a, he natna lo chhuahna chungchanga kan ngaihdan hlui takte a thlak danglam thei dawn a ni.
He zirchianna hi Colombia-a Tequendama I rock shelter-a hmuh, kum 5,500 kal taa hunter-gatherer (ramsa kap leh thlai zawnga khawsa) pakhat ruhro atanga lak a ni a. Mithiamte chuan he ruhro atang hian DNA fragment maktaduai 1,500 zet an endik hnuah Treponema pallidum genome hi an thliar hrang thei ta a. He bacteria hi tunlai syphilis natna thlentu nen a inang lo deuh a, mahse an inlaichinna a hnai hle a, kum 13,700 vel kal taa hrang (diverge) tawh nia hriat a ni.
He hmuh chhuah thar hian ‘Columbian theory’ tia hriat lar, Christopher Columbus-an New World (America) atanga Europe-a syphilis a thlen nia sawi thin chu a nghing hle a. Mithiamte chuan he natna thlentu hi khawvel hmun hrang hrangah mihringte an darh rual khan a lo awm daih tawh zawk niin an ring a. Tunah hian khawvel hmun dang danga thlan hlui leh ruhro hrang hrangte endik chhunzawm leh turin hma an la mek a ni.