North Texas-a Bonham khuaah vanduaipuina rapthlak tak thlengin, unau pathum chu vur tling (frozen pond) chunga an playing laiin an tla hlum a ni. He vanduaipuina hi Thawhtanni khan thlengin, naupangte hi kum 6, 8 leh 9 mi chauh an la ni hlawm a. An nu, Cheyenne Hangaman chuan a fate chhan tumin nasa takin bei mah se, vur chu a keh zel avangin a chhan chhuak thei ta lo a ni.
Nu ber Hangaman-i chuan CBS News hnenah a fate thih dan hi sawiin, ‘An pathum an ni a, kei mah chauh ka ni si a… chuvang chuan ka chhan thei lo a ni,’ tiin lungchhia takin a sawi. A fapa naupang ber, kum 6 mi Howard Doss chu vur chungah ‘ice skate’ tumin a kal hmasa ber a, mahse vur chu keh zuiin tui vawth takah a tla ta a. A u pahnih, Kaleb (kum 8) leh EJ (kum 9) te chuan an nau chhan tumin an zuan lut ve nghal a, mahse tui a vawh em avangin an taksa chu a ‘shock’ nghal a, an talbuai ta a ni.
Hangaman-i hian a fate hi tui atanga pawn lama hlang chhuak tumin a bei nasa hle a, mahse vur chu a nem em avangin a hlang chhuak thei lo a ni. Vanneihthlak takin an thenawm hnai, naupangte school-a football coach chuan a au thawm hriain a chhan chhuak a. He coach hian sakawr hruia Hangaman-i hi tui atangin a hnuk chhuak a, mahse naupangte erawh chhan hman an ni ta lo. Sheriff office-in an tarlan danin, naupang u pahnih hi tui atanga lak chhuah an nih hnuah damdawi in panpui nghal an ni a, mahse an nunna chhan hman a ni ta lo a ni.
He vanduaipuina hi US-a khawchin tha lo, vur thlipui tleh (winter storm) vanga thihna thleng zinga pakhat a ni. Kar kalta chhung khan Texas leh a chhehvelah vura thlipui tleh avang hian mi 20 chuang an thi tawh a, in tam takah kurrent a awm lo bawk. Naupangte school chuan he vanduaipuina hi ‘unimaginable loss’ tiin an sawi a, zirlai leh thawkpuite tana tanpuina (counselling) an buatsaih nghal thu an tarlang a ni.