TikTok chuan social media atna (addiction) thlen chungchanga California-a thubuai lian tak an hmachhawn tur chu, rorêltu tur (jury) thlan chhuah hma lawkin inremna an siampui ta a ni. He thubuai hi hmeichhe pakhat, KGM tia hming invuah chuan a lakah a thehlut a, social media algorithm-te hian atna a thlen bakah, rilru hriselna nasa takin a khawih pawi tih a sawi.
Social Media Victims Law Center chuan TikTok nen inremna an siam tih hi an nemnghet a, mahse an inremna chanchin erawh thup tlat a ni. He thubuai hian social media platform lian dangte pawh a huam a, Meta (Instagram leh Facebook neitu) leh Google (YouTube neitu) te erawh chuan an la hmachhawn chhunzawm dawn a ni. Snapchat pawh khan kar liam ta khan hetiang bawk hian inremna a lo siampui tawh bawk a ni.
He thubuai hi US legal system-ah chuan thil thar leh pawimawh tak a ni a, tech company lian tak takte’n an siam chhuah thilte hian naupang leh thalaite lakah thil tha lo a thlen em tih enfiahna hmasa ber a ni dawn a ni. Social media company-te chuan 1996-a ‘Communications Decency Act’ hnuaiah thiam an inchan thin a, midangte thil post avangin mawh an phur lo tih an sawi thin. Mahse, tun thubuai-ah erawh hian an apps design leh algorithm-te’n hmanna kawng an kawhhmuh dan zawk a ni an khawih tak ni.
He thubuai kal zelah hian Meta hotu lian Mark Zuckerberg pawh thuhretu atan koh a ni dawn a. Tech industry-ah hian naupangte himna chungchangah sawiselna a nasa tawh hle a, Australia sorkar phei chuan kum 16 hnuailam tana social media hman a lo khap tawh a ni. Tech company-te hian hlawkna ringawt um lovin thalaite nunna leh hriselna an ngaihpawimawh a ngai tawh dawn tih he thubuai hian a tilang chiang hle a ni.