United States-a TikTok hmangtute’n Pathianni atanga buaina an tawh, video upload hleithei lo leh video thar tlipte’n entu (views) an neih loh chhan chu hriat a ni ta a. TikTok US enkawltute, TikTok USDS Joint Venture chuan hemi chhan chu US-a an data center pakhatah electric thahrui hman tur a chhiat (power outage) vang a nih thu an puang.
He buaina hian TikTok chauh ni loin app dangte pawh a nghawng a. Thawhtanni zing khan X (Twitter hmanlai) kaltlangin hriattirna siamin, an hmanruate siamtha turin hma an lak mek thu an sawi. Users tam takin an video thar ‘0 views’ a nih chhan leh an pawisa hmuh tur (earnings) a bo em tih an hlauhthawnna chungchangah, TikTok chuan heng engagement leh data-te hi an him vek tih a sawi bawk a ni.
Hmasawnna a awm deuh hnuah pawh, users tam takin login harsatna, video upload muang lutuk, leh For You Page-a thil thar lang thei lo ang chi buainate an la tawk chhunzawm reng a. Hetiang harsatna hi thuneitu thar, Donald Trump-a thlawptute’n TikTok an lakluh hnua harsatna lian tham an tawh hmasak ber a ni a, hemi vang hian mi tam tak chuan rinhlelhna thila thil thleng a nih te pawh an ring hman hial a ni.
App-in hma a sawn leh rual hian, TikTok chuan US hmangtute lakah data lakkhawm dan thar a kalpui tan bawk a. Wired-in a tarlan danin, TikTok hian tun hma aiin hmangtute awmna (GPS location) kimchang zawk a hre thei tawh dawn a ni. Hemi chauh ni lo hian, AI nena an inbiakna leh thil ziahte pawh vawn that a nih tawh dawn avangin, privacy chungchangah sawiselna a tam hle. Donald Trump-a chuan he app hi ‘100 percent MAGA’ ni tura a duh thu a lo sawi tawh bawk a, nakin lawka thil danglam leh technical buaina la awm thei turte chu hmangtute’n an thlir thup a ni.