United States President Donald Trump chuan Iran chu an nuclear programme chungchanga inremna an neih thuai loh chuan ‘hun a tlem tawh’ tih hriattirin vaukhana a siam a. Hei hi Persian Gulf vela US sipaite an inbuatsaih leh an inlakkhawm ruih ruih laia thleng a ni. Trump-a chuan Truth Social-ah thuziak chhuahin, US sipai thawkchhuakte chu ‘Armada’ lian tak, chak tak leh thuvawn (purpose) nei reuh tak an nih thu a sawi a, Iran chu inbiakna dawhkana thu turin a sawm bawk.
Tun hnaiah hian US chuan an tui sipai chakna ber zinga mi, aircraft carrier USS Abraham Lincoln hruaiin armada thawkchhuak tawh a, hei hi BBC Verify pawhin an thlihlai dan a finfiah tawh a ni. Trump-a chuan he ralthuam chakna hi Venezuela hruaitu hlui Nicolás Maduro an man hmaa an thawn chhuah ai pawha lian zawk a nih thu a sawi a. ‘He chakna hi thiam tak leh a tul a nih chuan rawng tak pawha an hna hlen chhuak tura peih reng an ni,’ tiin a sawi belh bawk.
Hetih lai hian, Iran Foreign Minister Abbas Araghchi chuan thuchhuah siamin, sipai chakna hmanga vau hmang hian inremna a neih theih loh thu leh hetiang thil hi a hlawk lo hle tih a sawi ve thung. Iran chuan inbiakna an duh a nih chuan US hian an vaukhana leh thil phut loh loh an neih thinte hi an dahtha tur a ni tih a sawi. Iran chuan an nuclear programme hi ralthuam siamna tur ni loin, remna kawng a nih thu an sawi reng bawk a ni.
Hemi hma hian, kum 2025 June thla khan US chuan Iran nuclear hmunpui pathum—Fordo, Natanz, leh Isfahan-ah te ‘Midnight Hammer’ tia vuah hmangin beihna a lo thlak tawh a. Trump-a chuan, ‘A dawt leh chu a la rapthlak zawk ang! Thlentir nawn tawh suh u,’ tiin a vau zui bawk a ni. Tunah hian Iran chhungah sorkar laka lungawilohna nasa tak a awh a, Human Rights Activists News Agency (HRANA) chuan mi 6,000 dawn an thi tawh tih an sawi a, thihna thleng hi a aia tam a nih an rin thu an tarlang bawk.
US official-te chuan ‘Midnight Hammer’ beihna khan Tehran-in nuclear ralthuam an siam chhuah tur chu hun engemaw chen a tikhawtlai tih an sawi a. Tunah hian President Trump-a hian a hma aia nasa zawka hrek (sanction) leh nawr (pressure) a thlang leh tawh a ni. Sipaite an inbuatsaih rual hian, khawvel hmun hrang hrangah helai hmuna indona a chhuah leh chhuah loh tur chu thlir thup a ni mek bawk a ni.