World heavyweight champion hlui Tyson Fury chuan boxing khawvelah a lo kir leh dawn tih a puang a, kumin April ni 11 hian UK-ah Arslanbek Makhmudov a hmachhawn dawn a ni. He inbeihna hi Netflix kaltlanga khawvel hmun hrang hranga thlir theih tura ruahman a ni a, Fury-a tan chuan kum 2024 December thlaa Oleksandr Usyk laka a hnehna a hloh hnua a vawi khat inbeihna lehna tur a ni.
Kum 37-a upa Fury hian Usyk a hneh loh hnu thla khat velah boxing a chawlhsan (retire) thu a lo puang tawh a, mahse kumin January thla tir lam khan a lo kir leh tur thu a sawi leh ta a ni. ‘Boxing-ah hian ka thinlung a awm reng a, a awm chhunzawm zel bawk ang. Lal chu a lo kir leh tawh tih hi khawvel hmun tinah mi lo hrilh r’u,’ tiin a phur thu a sawi a, a thiamna a la hloh loh thu a tarlang bawk.
A hmachhawn tur Arslanbek Makhmudov hi kum 36-a upa Russian boxer a ni a, a career-ah hnehna vawi 21 a chang tawh a, vawi hnih chiah a la tlawm a ni. A inbeihna hnuhnung berah October thla khan British boxer Dave Allen a lo hneh tawh bawk. Fury hian kum 2022 hnuah a vawi khatna atan UK-ah a inbei dawn a, a hmain Derek Chisora lakah Tottenham Hotspur Stadium-ah hnehna a lo chang tawh a ni.
Morecambe fighter Fury hian vawi 37 a inbeihnaah vawi 34 hnehna a chang tawh a, chung zinga vawi 24 chu knockout-a hnehna chan a ni. World champion vawi hnih lo ni tawh mahse, vawi khat mah title zawng zawng kawp (undisputed) thei a la ni lo. Kumin hian Makhmudov a hneh a nih chuan, Usyk laka a tlawmna hruk fiah leh a tum hle a ni.