France leh La Rochelle tana khel thin, rugby khawvel-a hming langsar Uini Atonio chuan ‘cardiac event’ (lung lampang harsatna) a neih avangin professional rugby khelh a chawlhsan thu a puang ta. He kum 35 mi, thahrui ngah leh lian tak mai hi Thawhlehni khan La Rochelle-a damdawi in pakhat intensive care unit (ICU)-ah dahluh a ni a. A khelhna club La Rochelle chuan Atonio hian lung lama harsatna a nei tih an sawi a, tunah hian a dinhmun erawh a pangngai (stable) tawh viau tih an tarlang.
He French Top 14 team hian thuchhuah siamin, damdawi in a chhuahsan hnuah pawh Atonio hian hun rei tak chawlh leh in enkawl a mamawh dawn thu an sawi a. Kum 2011 atanga La Rochelle tana rinawm taka khel tawh Atonio hi tun hnaia lung lama harsatna a neih thut avang hian professional rugby-ah hian hmuh zui a nih a rinawm tawh loh hle a ni. He chanchin hian rugby ngainatute a barakhaih hle a, amah hi France ram tana thil tam tak lo hlen tawh tu a ni.
Atonio hi New Zealand-a piang a ni a, mahse France-ah hun rei tak a lo awm tawh avangin an ram tana khel thei turin a in tling (qualified) a, France tan vawi 68 lai a inlar tawh a ni. A taksa lian leh rit tak mai, a vanglai chuan 26st (165kg vel) zeta rit a ni a, kum 2022 khan Six Nations Grand Slam an laknaah khan a pawimawh hle a ni. Chutiang bawkin kum 2015 leh 2023 World Cup-ah te pawh khan France tan hian theihtawp a lo chhuah tawh bawk.
Kum 2025 khan France-in Six Nations an lak lehnaah khan game 5-ah a inlar vek a, kumin a tournament thleng tur atan pawh provisional squad-ah thlan a ni nghe nghe. Mahse, a lung lampang harsatna thut avang hian a inhnukdawk ta a ni. Atonio hi club pakhat rinawm taka vuan tlat mi a ni a, Champions Cup final vawi thum lai (2021-2023) an luhnaah leh an vawi hnih champion-naah khan La Rochelle tan a hlutna a lantir nasa hle a ni. Tunah hian a lung lampang hi fiahna tam tak neih mek a ni a, a hriselna hmasa ber a nih thu club lam chuan an tarlang.