Nikum 2025 chhung khan United Kingdom (UK) rama car, van, truck, leh bus siam chhuah zat chu kum 73 chhunga a hniam ber tum a ni a, hei hi kum 1952 hnu lama a tlem ber kum a ni tih Society of Motor Manufacturers and Traders (SMMT) chuan an tarlang. SMMT Chief Executive Mike Hawes chuan nikum kha ‘thlah khat chhunga kum harsa ber’ a nih thu sawiin, Jaguar Land Rover-a cyberattack thleng te, Vauxhall-in an factory pakhat an khar te, leh US trade policy chungchanga chiang lohna awmte chu a chhan lian ber a nih thu a sawi.
SMMT tarlan danin, nikum chhung khan motor 764,715 chauh siam chhuah a ni a, hei hi kum 2024 lakah 15.5% in a tlem zawk a ni. Heng motor siam chhuah zinga a tam ber chu car niin, car 717,371 chauh siam a ni. Kum 2016-a car maktaduai 1.7 chuang an siam chhuah thin nen khaikhinin a hniam tawh hle a. Analysts-te chuan Brexit vanga buaina hrang hrang te, kum 2021-a Swindon-a Honda factory khar te, leh hripui (Covid) nghawngte khan motor industry hi a tichhe hle tih an sawi bawk.
Harsatna thleng langsar zual pakhat chu nikum September thlaa Jaguar Land Rover computer network beih a ni a, hei hian factory-te a tichawl a, thla khat chuang motor siam chhuah a nih loh phah a ni. Chu bakah, Vauxhall-in Luton-a an factory an khar hlen tak vangin commercial vehicle siam chhuah zat pawh 62% laiin a tlem phah bawk. US-in motor lak luhna chhiah (tariffs) tihsan a tum vangin motor siam chhuaktute khan America-a motor thawn chhuah an tlem phah bawk a ni.
Hma lam hun thlir chuan, SMMT chuan kumin lamah erawh hma sawn deuh an inbeisei a, car siam chhuah zat hi 10% velin a san an beisei a ni. Nissan leh JLR-in electric vehicle (EV) thar an siam chhuah tan tawh avangin kum 2027-ah chuan motor maktaduai khat chuang siam chhuah leh theih an inring a. Mahse, Hawes-a chuan European Union (EU) lamin ‘Made in Europe’ policy hman an tum chu UK motor industry tan hlauhawm lian tak a nih thu a sawi a, hei hian Europe market-a UK motor-te zawrh a tihharsat hle a hlauhawm a ni.