UK Prime Minister Sir Keir Starmer chuan England leh Wales-a court thubuai tangkhang nasa lutuk (backlog) tihziawm nan jury hmaa inbeihna (jury trials) tih tlem an tum chu an thulh dawn lo tih a sawi. Beijing pan a thlawhna chhunga chanchinbu mi a biaknaah, thubuai kalpui a nih tlai lutuk vanga pawikhawih tuartute’n dikna (justice) an hmuh loh hi a thlen nawn a phal tawh lo tih a sawi a ni. He ruahmanna hian Labour MP-te leh ukil-te zingah sawiselna nasa tak a thlen mek a ni.
Sorkar ruahmanna thar hnuaiah hian England leh Wales-a jury trials hi a chanve zet (50%) tih tlem tum a ni a. Ministry of Justice-a record thar berah chuan court-a thubuai chingfel loh hi 79,600 chuang zet a awm tawh a, kum 2028-ah phei chuan 100,000 zet a tlin hmel a ni. He ruahmanna hian thiam loh chantirna (sentence) kum 3 aia rei lo tur thubuaite a huam dawn a, hemi chinah hian defendant-te chuan jury hmaa an thubuai sawi an thlang thei tawh dawn lo a, magistrate emaw, judge chauh emaw hmaah thubuaite hi sawi a ni tawh ang.
Mahse, he ruahmanna hian sawiselna nasa tak a thlen a, Labour MP tam tak pawh sorkar lakah hian an lungawi lo hle. Opposition hruaitu Kemi Badenoch chuan he hmalakna hian court-a rinhlelh loh leh rinngamna a tichhe thei a, justice system bulthut a tiderthuang a ni tiin a sawisel bawk. Karl Turner, Labour MP leh barrister ni bawk chuan, sorkar hian ‘pawisa ren’ a tum vang chauh a ni tiin David Lammy chu a sawisel a, Starmer-a chu he ruahmanna vanga zah tur a ni tih a sawi bawk.
Starmer-a chuan prosecutor a lo nih tawh thin avangin thubuai kalpui a nih tlai lutuk hian mipui rinna a tihchhiat thinzia a hriat chian thu a sawi. ‘Hmeichhia leh hmeichhe naupang chunga pawikhawihna thubuaite leh pawikhawih tuartute tan hian ka theihtawp chhuaha justice pe turin thutiam ka nei a, ka thutiam chu ka bawhpelh dawn lo a ni,’ tiin a sawi. Tunah hian criminal cases 3% chauh jury hmaah kalpui a ni a, ruahmanna thar hian chu ai chuan tlem deuh chauh a tihniam dawn a ni tih a sawi bawk. Justice Secretary David Lammy chuan kum 2029 atangin thubuai tangkhang hi a tlem tan a rin thu a sawi a ni.