UK sawrkar chuan Britain-a puitling zawng zawngte tan Artificial Intelligence (AI) hman dan zirna a thlawna hman theih tur a tlangzarh a. He ruahmanna hi kum 2030 thlengin hnathawktu maktaduai 10 hnen thlenpui an tum a, ram hmasawnna atana thil pawimawh tak niin an ngai. Kum 1971-a Open University din a nih hnua sorkarin zirmirna lama hma a lak nasat ber tum a ni hial dawn niin an sawi.
He training hi online-a neih tur a ni a, chatbot-te hman dan leh office hna hrang hrang awlsam zawka thawh dan turte zirtir an ni dawn a ni. Amazon, Google, leh Microsoft ang tech giant lian tak takte pawhin he zirlai siamnaah hian an pui a. Zirlai hi a tawi berah minute 20 vel atanga darkar tam tak chhung zir tur thlengin a awm a, zirlai zo te hnenah hian ‘virtual badge’ pek an ni bawk ang.
Nimahsela, Institute for Public Policy Research (IPPR) chuan he ruahmanna hi a tawk lo maithei tih an lo sawi ve thung a. Chatbot hman dan thiam ringawt hi a tawk lo va, thil thliar thiamna leh hruaitu tha nihna (leadership) te, he technology him taka hman dan turte pawh thiam tel a ngai tih an sawi a ni. IPPR-a senior research fellow, Roa Powell chuan hmasawnna tlo siam tur chuan zirlai tawi (short technical courses) ringawt a tawk lo tih a tarlang.
Technology Secretary Liz Kendall chuan Britain mipuite hian AI an hman thiam a, hna an thawhpui theih a pawimawh thu a sawi a. ‘Inthlakthlengna hi chu a lo thleng ngei ngei dawn, mahse a nghawng erawh kan thunun thei a ni. Ram mipuite hian he technology thar hi hlau lovin hmasawnna atan an hman thiam kan duh a ni,’ a ti bawk. NHS leh local government hrang hrangte pawhin an hnathawktute he training la tur hian an duh thu an sawi tawh a ni.