United Kingdom-a rollercoaster hlun ber, kum 100 chuang zet hman tawh ‘Scenic Railway’ chu hman a nih tawh loh tur thu puan a ni. Kent-a Dreamland Margate amusement park chuan Thawhlehni khan he thutlukna hi puangin, a chawlhpui hlen tawh dawn tih an sawi a. He rollercoaster hi hmun hlu leh chanchin nei tha (Grade II* listed) anga ngaih a ni a, Britain-a rollercoaster la awm zinga hlun ber a ni.
Kum 1920-a hawn hmasak ber ‘Scenic Railway’ hi thing hmanga siam a ni a. Chanchin duhawm lo tak tak pawh a lo pal tlang tawh a, kum 1949 leh 1957 khan a lo kang tawh a, tin, kum 2008-ah pawh mi tute emaw vanga nasa taka a kan leh hnuah kum 2015 khan restoration neih a ni a. He hna thawk tur hian thing tone 320 chuang zet an hmang a, park leh a chhehvel tih hmasawnna atan pound maktaduai 18 zet sen a ni bawk.
Park enkawltute chuan he thutlukna hi an tana thutlukna harsa tak a nih thu an sawi a. ‘National Lottery Heritage Fund’, ‘Historic England’ leh ‘Thanet District Council’ te nen uluk taka an sawiho hnuah, he rollercoaster hi a hun a tawp tawh niin an hria a ni. Kum 2024-a chhiatna tlem a tawh hnu khan hman zui a ni tawh lo va, uluk taka an endik hnuah hman leh tlak a ni tawh lo tih hriat a ni. Park thupuangtu chuan, ‘Kum 100 chuang hman a nih hnuah he ride hian a hun a hmang zo tawh a ni,’ tiin a sawi.
Amaherawhchu, he thil hlun tak hi an tichhe vek dawn lo thung a. Park thupuangtu chuan Scenic Railway hi tumpui dang neiin an la chhawr zui dawn tih a sawi a. Kum 2026 chhung hian a chanchin tarlanna ‘pop-up exhibition’ neih an tum a, mipuiin a hmaa an hman thin dan ni lo deuhva an la tlawh theih dan tur an ngaihtuah mek a ni. Park chuan mipui hnenah he rollercoaster-a an hun hman tawh dante leh a hmanna tur thar rawtna te pawh a dil nghal a ni.