UK sawrkar chuan England-a school-te chu zirlai hrem (suspension) ngai te chu an school-ah ngei dahlawk a, in lama haw tir nghal lo turin thurawn thar a pe. Education Secretary Bridget Phillipson-i sawi danin, zirlaiten school an chawlhsan hian ‘social media’ leh ‘video games’ lama an tlan chhiat phah thin a, hei hian an zirnaah nasa takin nghawng a nei thei a ni. Sawrkar chuan school chhungah ngei hremna (on-site suspension) kalpui hi tharum thawhnaa inhnamhnawih lo zirlaiter tan a duhpui hle.
Department for Education (DfE) chuan he ruahmanna thar hi zirlaiten an zirna an hmaih loh nan leh school system thlak danglamna tura hmalakna pakhatah a sawi. Tun hma chuan zirlai hremte hi an haw nghal mai thin a, mahse hei hian an zirna leh an rilru put hmang a tichhia tih an hria a ni. Phillipson chuan, ‘School hruaitute tan discipline vawn nan suspension hi a pawimawh reng a, mahse in lama an awm hian social media khawvelah an lut thuk ting a ni,’ tiin a sawi.
England-ah hian school suspension hmuh tur a tam tial tial a, Covid-19 hnuah phei chuan a nasa lehzual hle. Kum 2022-23 leh 2023-24 inkarah suspension hi 21% zetin a pung a, zirlai 787,000 atangin 955,000-ah a kai chho a ni. Primary school-ah phei chuan a pung nasa zual hle a. Head teacher-te hian hremna dan tur chu an thlang thei dawn a, mahse in lama haw tir hi chu a tawp khawkah chauh hman turin sawrkar hian a duh a ni.
Mahse, school head teacher-te leh union hrang hrangte chuan he ruahmanna thar hi huphurhna lai an nei a ni. Association of School and College Leaders (ASCL) chuan zirlai hremte school-a enkawl zui tur chuan thawkktu (staff) leh hmunhma hran neih a ngai a, sawrkar hian budget thar a pek belh si loh chuan kalpui a harsa dawn tih an sawi. Chutih rualin, Special Educational Needs and Disabilities (Send) nei zirlaiten suspension an hmuh tam avangin, heng zirlaiter tan hian he hmalakna hi a tangkai zual hle tura ngaih a ni.