Ruth-i (hming thlak) chuan kum 2020 khan a bialpa hlui, West Midlands Police-a thawk officer pakhat lakah pawngsual thubuai a thehlut a. Mahse, thudik zawnna kawngah harsatna namen lo a hmachhawn a, amah zawk chu dawt sawia thubuai tihkawi tumah puhin, court-ah kum tam tak trial a hmachhawn a ngai ta zawk a ni. He thubuai hian UK-a hmeichhe tan dikna chan a harsa hle tih a tarlang chiang hle a ni.
A bialpa hlui hian sex an hman laiin a rukin audio a lo record a, chu chu police-te hnenah pein, Ruth-i chu a hlim hle zawk a, a duh thu ngeia sex hmang an ni tih fiahnaah a hmang a. Warwickshire Police officer-te pawhin he recording hi ngaihthlakin, Ruth-i chu ‘scorned woman’ (hmuhsitna vanga phuba lak tum) niin an puh a, a chungah hremna sang tak, damchhung lung in tan theihna ‘perverting the course of justice’ thubuai an siamsak ta a ni.
Court-ah thubuai ngaihtuah a nih laiin, Ruth-i lawyer Sophie Murray chuan he audio recording hi jury-te hmaah a play a. Chutah chuan thudik hmuhchhuah a ni ta a ni. Recording-ah hian hmeichhe nui ri leh hlim ri hriat tur awm kha chu an hnung lama porn film lo in-play ri a ni tih hmuhchhuah a ni a. Ruth-i zawk chu na tuara ‘no’ leh ‘get it out’ tiin a lo au zawk a ni tih fiah a ni ta a ni. He thil hian court chhunga boruak a thlak danglam hneh hle.
Jury-te chuan darkar khat vel chauh an ngaihtuah hnuin Ruth-i hi thiam loh an chantir lo a ni. He thubuai vanga trial kalpui a nih hnu hian, judge chuan Warwickshire Police leh CPS (Crown Prosecution Service) te thubuaia an chet dan chu a rinhlelh thu leh an enfiah leh a ngaih thu a sawi a. Ruth-i erawh chuan a thil tawn hi a hrehawm hle tih sawiin, mahse thudik a report avang hian a inchhir loh thu leh midang tan zirtirtu a nih a beisei thu a sawi a ni.