Shetland khawpui Lerwick-ah kum tina hman thin ‘Up Helly Aa’ fire festival chu ropui taka hman leh a ni a. He huna hian Norse thlahtute kalsung leh an nunphung chawisângin, torch bearer sang chuang leh Viking-a inthuamte an thawk chhuak a, zan thim hnuaiah Shetland vanpui chu meichher engin a chhun eng ruih mai a ni. Europe-a meichher hmanga festival hman lian ber a ni a, he hun hmuhnawm tak thlir tur hian khawvel hmun hrang hrang atangin mi thahnem tak an rawn pungkhawm a ni.
He hun hi kum tin January Thawhlehni hnuhnung berah hman thin a ni a, tualchhung mi ‘guizers’ an tih ten meichher nena khawpui an fang kual hnuah, Viking lawng (long ship) lem an siam chu meiin an rawn hal a. He lawng lem hi kumin atan kum khat chhung zet uluk taka an siam a ni a, a hmingah ‘Skyldulid’ tiin an vuah a ni. Meichher 1,000 zet hmanga hal a nih hnuah he lawng hi vut-ah a chang ta vek a, a thlirtu mipui nuai chuangte chuan an au pui dur dur a ni.
Kumin parade hi ‘Jarl Squad’ an tih ten an hruai a, an hruaitu ber (Guizer Jarl) chu kum 58-a upa Lynden Nicolson a ni. Nicolson-a hian he dinhmun thleng tur hian kum 18 zet a nghah a ngai a, he festival kum 145-a upa chanchinah nghah rei ber record a siam hial a ni. Ama rual hian naupang lam ‘Junior Jarl Squad’ te pawh kum 14-a upa Frankie Walterson hruaiin an thawk chhuak bawk a, an incheina leh an thil ken hrang hrangte chu mipuite thlir theih turin an entir a ni.
He festival-ah hian Europe-a mi chak ber Luke Stoltman leh khawvela mi chak ber vawi thum ni tawh Tom Stoltman te unau pawh Invergordon atangin an rawn kal a. Singapore leh Canada atang te pawhin he hun hmuhnawm tak thlir tur hian an rawn zin hlawm a ni. He festival-a tel squad hrang hrang 65-te hian an incheina leh an thil siamte chu tualchhung sikul leh care home-ah te an entir kual a, Nilaini khawvar thlengin lawmna hi a kal chhunzawm a. He festival lawmna vang hian Shetland-ah chuan Nilaini hi public holiday-ah puan a ni nghal bawk.