US sorkar hnuaia cybersecurity leh thuruk vawngtu pawl lian ber, Cybersecurity and Infrastructure Security Agency (CISA) acting director Madhu Gottumukkala chuan sorkar thuruk pawimawh tak mai, public ChatGPT-ah a vawm lut (upload) palh tih hriat a ni. He thil thleng hian sorkar chhungah inrinlawkna (internal cybersecurity warnings) hrang hrang a tichhuak a, sorkar bungrua leh thurukte tihlan palh a nih loh nan Department of Homeland Security (DHS) chuan hma a la nghal a ni.
Tarlan a nih danin, Gottumukkala hian CISA-in contract an siamna leh thil pawimawh dangte chu nikum nipui lai khan ChatGPT-ah hian a lo vawm lut a. He AI chatbot hi DHS hnuaia thawk dangte tan hman phal a ni lo a, mahse Gottumukkala hian he agency-a a luh hlim hian hman phalna hranpa a dil a ni. Sorkar hnathawk dangte chuan sorkar bituk, ‘DHSChat’ ang chi chauh an hmang thei a, hengte hi thuruk leh hriatna dangte sorkar network pawn lama chhuak thei lo tura duan an ni.
He thil thleng avang hian investigation neih mek a ni a, hotu ber hian a ‘security clearance’ (thuruk hmuh phalna) a hloh phah hial thei tih tarlan a ni. He thuruk a vawm luh hi ‘for official use only’ tia chhinchiah a ni a, tlangzarh phal a nih loh vanga tihlan palh a ni. OpenAI lam erawhin he thil chungchangah hian engmah an la sawi lo a, mahse cybersecurity mithiamte chuan public AI tool hman hi a hlauhawm thei hle tih an sawi a, kan thil vawm luhte hi AI hian a lo vawng reng thei tih an sawi bawk.
He buaina bakah hian CISA chhungah hian inbeihna leh thil dang a thleng nual bawk. Gottumukkala hi a hnuaia thawkten an ring lo hle tih sawi a ni a, kumin chhung hian staff 3,400 atangin 2,400-ah an tlahniam tawh bawk. Congress pawhin he agency hian China leh hmelma dangte lakah US a vawng him zo dawn em tih an zawt a, hotu berin dawt sawi hriatna khawl (polygraph test) a lo fail tawh nia tarlan a nih bawk avangin sawisel a hlawh hle a ni.