Khawvel chanchinbu lian hrang hrangte chuan tun hnai hian Middle East boruak, a bik takin US leh Iran inkar boruak chhiat zia an tarlang hlawm a. ‘Daily Mail’ chuan he dinhmun hi ‘Indona meipui chhuah hma chhinchiahna’ (Countdown to conflagration) tiin a ko hial a. US President Donald Trump-a’n Iran lakah vauhliau na tak chhuahin, nuclear chungchanga inremna an siam lo a nih chuan ‘sipai chakna hmanga tihchhiat’ (military onslaught) an hmachhawn tur thu a hriattir a ni.
He vauhliau rual hian US sipai lawng rual (armada) chu Iran lam panin an thawk chhuak tawh a. President Trump-a’n a Truth Social account-a a ziah danin, heng sipai lawngte hi an hna thawk turin an inpeih thawkhat hle a, hmanhmawh leh chak takin an che chhuak dawn a ni. Tunah hian USS Abraham Lincoln hruaiin US armada-te hi Gulf lam panin an kal mek a, hei hian khawvel mipui rilru a tihausa hle a ni.
Iran lam pawh an ngawi mai bik lo a, an foreign minister chuan an sipai officer-te chu ‘silai hmetper (trigger) tura inpeih reng’ an nih thu a sawi ve thung. Iran sorkar chuan US-in an ram a bei a nih chuan chu chu ‘indona tan’ (act of war) ah an ngai dawn tih a sawi a. Tehran khawpuia cheng tam tak pawh indona a chhuah thut hlauvin an khawpui chhuahsanin an tlan chhia tih ‘i Paper’ chuan a tarlang bawk.
He indona boruak bakah hian UK chhungah pawh chanchin thar pawimawh tak tak a awm nual a. Prime Minister Keir Starmer-a’n Iraq-a British sipai hlawmte chhui tura European human rights laws hman a tum chungchang ‘Daily Telegraph’-in a tarlan te, leh UK-a sumdawnna hmunpui (high streets) tlachhia chu Labour Party tan thil hlauhawm a nih tur thu Southampton University-in an zirchianna an tarlang bawk a ni. Tin, nurse Lucy Letby-i thiam loh chantir chungchanga police officer pension tawh pakhatin thiam a chan thu a sawi pawh ‘The Sun’ chuan a tarlang tel a ni.