US Supreme Court chuan Paramount Global laka zualko, Michael Salazar-a thubuai chu ngaihtuah turin an pawm a. He thubuai hian kum 1988-a siam ‘Video Privacy Protection Act’ (VPPA) chu tunlai online video streaming leh data inpek chhuah chungchangah a hman theih leh theih loh a hril dawn a ni. He dan hi a tirah chuan video cassette rent-tu chanchin thup nana siam a ni a, mahse tunlai thiamna thar nen a inhmeh leh hmeh loh chungchangah Supreme Court hian thutlukna a siam dawn a ni.
Michael Salazar hian kum 2022 khan Paramount lakah hian thubuai a thehlut a. Paramount-in an website 247Sports.com-a a video thlirte chu a phalna hriatpuina tel loin Facebook (Meta) hnenah an pe chhuak tih a sawi a ni. Salazar-a sawi dan chuan, Paramount hian ‘Meta Pixel’ an hman avangin a video thlir dan leh a Facebook ID thlengin automatic-in Facebook hnenah hriat tir a ni a, hei hi privacy dan bawhchhiatna liau liau a ni tih a sawi. Paramount leh Facebook hian he hriatpuina hi advertisement hlawk zawk siam nan an hmang tih a sawi bawk.
He thubuai hian ‘consumer’ tih thumal hrilhfiahna chungchang a bitum ber a. Danah chuan consumer chu ‘video tape service provider’ laka thil lei emaw, subscribe-tu emaw a ni tih a ni a. Paramount chuan an website-a newsletter subscribe-tu mai a nih avangin Salazar hi ‘video consumer’ a tling lo tih an sawi a, mahse Salazar lam chuan newsletter subscribe-tu pawh a dan hian a huam tur a ni an ti ve thung. Court hrang hrangte hian he hrilhfiahna hi an kalpui dan a inang lo hle a, US ram chhunga Circuit Court hrang hrangte thutlukna pawh a inkhawm lo hle a ni.
Supreme Court-in he thubuai a ngaihtuah dawn tak avang hian online platform lian tak takte leh data analytics hmangtute chuan an data share dan tur chungchangah fimkhur a ngai tawh hle dawn a. Thubuai hi kum 2026-27 term chhungin ngaihtuah tura rin a ni a, October 2026-ah oral argument neih tan a ni ang. He thutlukna hian internet-a kan thil thlir chanchin leh kan privacy vawn nan nghawng lian tak a nei dawn a, digital khawvela dan hman chhunzawm dan tur thui tak a hril dawn a ni.