Volvo hian kum 67 zet liamta khan tunlai car kan hman apianga himna hrui (three-point seat belt) kan hman hi an lo hmuchhuak tawh a. He hrui hi an mahni engineer Nils Bohlin-a’n kum 1959 khan a lo siam chhuah a ni a, khawvel pumpui hman turin an patent hi an share zui bawk. Tunah hian Volvo chuan he technology hi an tihmasawn leh ta hle a, an car thar, all-electric SUV EX60-ah himna hrui thar ‘multi-adaptive safety belt’ an hman tur thu an puang ta a ni. He hrui thar hi car-a chuangte taksa len dan, rih dan, leh tawhsual tawh dan azira mahni lo insiamrem thei tura siam a ni.
He technology thar hi Volvo-in ‘SPA3 platform’ an tih, battery-electric motor chauh tura an duan-ah hman a ni a. Car-a computer hman ‘HuginCore’ (Norse mythology-a sava hming chawia phuah) hian second khatah thil vbc 250 chuang zet a ngaihtuah hman a. He brain thar hi Google, Nvidia, leh Qualcomm-te nena thawkhoa an siam a ni. Car pawn leh chhung lama sensor-te hnen atanga thuchhuak lo kal chu he computer hian rang takin a lo thliar hrang thin a, tawhsual thlen hma lawk—mitkhap kar aia rei lo chhung—khan hrui hi engtiang chiaha chah nge a nih ang tih thutlukna a siam hman a ni.
Mikael Ljung Aust, Volvo Cars Safety Center-a senior safety technical leader chuan he technology thar hi music system nena khaikhinin a vawm kual a. Music system-ah volume control tlemte awm aiin, control tam tak awm chuan ri tha zawk a siam thei ang bawkin, himna hrui thar hian chah dan chi 11 (load-limiting profiles) zet a nei ta. Tun hma car-ah chuan hetiang hi pathum vel chauh a awm thin a ni. Hei hian car-a chuangte chu mi lian tak an ni emaw, mi te tak an ni emaw, an taksa hliamna laka venhimna tha ber a pe thei dawn a ni.
Tawhsual a lo thlen hian sensor-te chuan car-a chuang rih dan leh an len dan an chhinchhiah nghal a. Entirnan, mi lian tak an nih a, chhiatna a nasat viau chuan lu hliam pumpelh nan hrui hi a chah dan (load level) sang zawkah a dah a. Mi te tak an nih a, chhiatna a nep deuh thung chuan awmruh (ribs) hliam lo turin a chah dan a lo ti hniam leh thung thin. He technology hi software update (over-the-air updates) hmanga tihchhuah a nih avangin, car neitute tan hun lo la kal zel turah hmasawnna thar a awm pawhin garage-a tlawh kher ngai lovin car computer-ah a update theih reng dawn a ni.