Trump White House chuan nimin khan Minnesota-a civil rights ukil Nekima Levy Armstrong an manna thlalak, digital-a siam danglam chu social media-ah an thehlut a. He thlalak-ah hian Armstrong-i chu a tap angin an lantir a, mahse a takah chuan huaisen tak leh zam miah lova officer-ten an hruai lai a ni thung. Department of Homeland Security (DHS) Secretary Kristi Noem-i’n a hmaa thlalak dik tak a post tawh hnuah, White House X account hian minute 30 hnu velah a hmel tap lai hmel anga siam danglam chu an post ve leh a ni.
He thil thlen chhan hi St. Paul-a Cities Church-a lungawilohna an lantir vanga man an nih hnu a ni. Protester-te chuan he biak in pastor David Easterwood hi Immigration and Customs Enforcement (ICE) officer a ni tih an sawi a, hei hi sorkar nena inzawmna thuk tak nei angin an ngai a ni. Armstrong-i hi NAACP Minneapolis branch-a president hlui a ni a, sorkar-in ‘far-left agitator’ tia ko-in, biak in-ah buaina a chawk chhuak hmasa ber anga puh a ni.
NAACP President leh CEO Derrick Johnson chuan White House thil tih hi nasa takin a dem a. ‘White House hian Nekima thlalak chu AI hmanga tidanglam-in, hmeichhe hlau leh tap lai angin an lantir a, mahse a takah chuan a zam lo hle a ni,’ a ti. Mahse, White House Deputy Communications Director Kaelan Dorr chuan an thil tih hi a thlawp tlat a, ‘Dan lekkawhna a chhunzawm zel ang. Memes pawh hi a chhunzawm zel ang,’ tiin a sawiselna lo chhanglet a ni.
Armstrong-i ukil Jordan Kushner chuan he thil hi mi tihmingchhiatna (defamation) chiang tak a ni tih a sawi a. Sorkar hian court system chu politics khelhna hmanruaah an hmang a, mimal hmingchhiatna tur thawk-in court-a jury-te ngaihdan pawh an tihkhawlo thei tih a sawi bawk. He thlalak siam danglam hian Armstrong-i tan court-ah sorkar an beihna hmanrua a siamsak thei dawn nia hriat a ni a, mi tam takin sorkar thil tih hi an thlawp lo hle a ni.