Tunlai hian McDonald’s ang chi restaurant lian leh dawr hrang hrangah mahnia order kan siamna tur touchscreen lian tak tak, self-service terminal (kiosks) an tih mai hi hmuh tur a tam ta hle a. Heng khawl hmang hian mite hian thil an lei hnem phah thin tih zirchianna hrang hrang chuan a tarlang a ni. He thil thleng hi ‘behavioural science’ hmanga zirchian a nih hnuah, kan rilru hman dan leh kan thutlukna siam tura min nawrtu thil pawimawh tak tak hmuhchhuah a ni.
Evoke Creative dintu Dean Ward chuan heng khawl hian sum an hmuh tam phah chhan tam tak a awm tih a sawi a. A pawimawh ber pakhat chu, mihring nena inbiak (human interaction) a ngai lo hi a ni. ‘Mi dang nena kan inbiak hian eng emaw kawng zawngin min lo thlir dan tur kan ngaihtuah thin a, mahse khawl hmaah chuan chutiang chu a awm ve lo. ‘Fries i belh duh em?’ tia min zawh hian, mi dang hmaah chuan ‘No’ kan ti fo a, mahse khawl hmaah chuan zak miah lovin ‘Yes’ kan ti mai thin,’ tiin a sawi.
Hetianga thil kan lei hnem zawk chhan dang leh chu khawl hian thil lem (images) mawi tak tak a tarlang thei a, chu chuan thil lei min chak zual tir thin a ni. Chutah, order kan siam chhung hian ‘hei hi i duh belh em?’ tih ang chi ‘upsell’ hi kan hmu deuh reng a, hun kan ngah zawk bawk nen, kan duh loh thil pawh kan hmet tel ta nge nge thin. Vita Mojo-in a tarlan dan chuan, khawl hmanga order siamte hian counter-a order siam aiin thil an lei hnem zawk a, a tam tham dan pawh 40% zet a ni thei a ni.
Behavioural science hi restaurant-ah chauh ni lovin, sumdawnna hrang hrangah hman a ni a. Entirnan, ‘authority bias’ an tih mai, thiamna nei sangte thurawn kan zui duh zawkna hi toothpaste zawrhnaah hmuh tur a tam hle a, ‘dentist-te thurawn’ tih hmang hian mite rintlakah an inngaihtir thin. Chutiang bawkin hla (music) hmang pawhin thil lei tur an thlak danglam thei a ni. Zirchianna pakhatah chuan supermarket-ah French hla an play chuan French wine a hralh hnem a, German hla an play leh German wine a hralh hnem thung a, mahse a leitute hian hla vang a ni tih an inhre miah lo thung a ni. Heng thil zawng zawng hian kan hriat miah loh hian kan thutlukna siam leh kan thil lei tur thlengin a lo her kual reng a ni.