Kum 2025 tir lam khan Forbes-in a tarlan danin, FBI chuan Microsoft hnenah warrant pein, Guam-a hna thawk lo tana tanpuina (unemployment assistance) dik lo taka lakna chungchanga hmuhchhuah Laptop thenkhat ‘BitLocker encryption recovery keys’ an dil a. Microsoft hian heng chabite hi a lo pe a ni. BitLocker hi Windows-in kum 20 chuang a lo hman tawh, disk chhunga data-te thuruka vawnna (encryption) a ni a. Windows 8 hnu lamah phei chuan Microsoft account nena i luh (sign in) chuan a ruka i PC-a data-te hi a lo vawng (encrypt) nghal vek thin a, hemi chabi (recovery key) hi Microsoft server-ah a dah nghal bawk a ni.
BitLocker hian i hard drive i hawn theih loh palh emaw, hardware i thlak huna i data i hloh lohna turin i chabi kha Microsoft server-ah a dah ve thin a. Mahse, hei hian Microsoft pawhin i data-te kha a duh chuan a hawng ve thei tihna a ni bawk. Microsoft chuan kum khatah sorkar atanga hetiang dilna ‘20’ vel an dawn thin thu a sawi a. Apple ang lo takin Microsoft hian i chabi hi a lo vawng ve reng thei a ni. Chuvangin, i mimal zalenna leh himna (privacy and security) i ngaihpawimawh a, Microsoft emaw sorkar emaw hnenah i chabi hi i dah duh lo a nih chuan kawng dang a awm a ni.
A hmasa berin, Windows 11 Home hmang i nih chuan ‘Pro’ version-ah i upgrade a ngai a, a chhan chu Home version-ah chuan Microsoft account hmang lova disk encrypt a harsa a ni. Settings > System > Activation-ah kalin i version i en thei ang. Pro version i neih hnuah, i PC kha ‘encrypt’ tawh a nih chuan i ‘decrypt’ (hawn) leh phawt a ngai dawn a. Settings > Privacy & security > Device encryption-ah kalin ‘Off’ tur a ni. A hawn vek hnuah, Control Panel-ah kalin ‘BitLocker Drive Encryption’ i hmet ang a, ‘Turn on BitLocker’ i hmet leh ang.
He thil hi i tih hnuah i PC-a data-te chu i chabi (recovery key) tello chuan tumahin an hawng thei tawh lovang. Tichuan, i recovery key kha Microsoft account-a dah lovin, file anga siama external disk-a dahna emaw, print-a dahthatna emaw ‘option’ i thlang thei tawh dawn a ni. Mahse, he chabi hi i hloh a nih chuan i data-te kha i chan hlen ve thei bawk tih hriat a tha. I himna leh i mimal nun zalenna (privacy) i dah pawimawh viau a nih chuan hetianga mahni chabi vawn that hi a finthlak hle a, sorkarin warrant hmanga i data laka Microsoft an nawr pawhin, Microsoft hnenah i chabi a awm tawh loh avangin an pe thei tawh dawn lo a ni.